Allir tíu þingmenn Suðurkjördæmis sendu í dag sameiginlegt bréf til Páls Magnússonar, útvarpsstjóra, og Óðins Jónssonar, fréttastjóra RÚV, þar sem þeir lýsa óánægju með að leggja af starf fréttaritara RÚV á Suðurlandi.
Magnús Hlynur Hreiðarsson á Selfossi hefur sinnt starfi fréttaritara RÚV undanfarin fimmtán ár en verktakasamningi við hann var sagt upp nú um mánaðarmótin.
Þingmennirnir segja ákvörðunina órökstudda og erfitt sé að að sjá hagræðingu í því að segja upp samningum við mann í verktöku og aka eða sigla í staðinn með töku- og fréttamann þegar á þarf að halda.
„Við blasir að fréttaflutningur af svæðinu mun minnka verulega og 15 ára farsælt starf fréttaritara lagt niður án þess að greinileg ástæða blasi við,“ segir í bréfi þingmannanna til yfirmanna RÚV.
Þingmennirnir óska eftir formlegum skýringum á þessari ákvörðun sem að þeirra mati vegur að þjónustuhlutverki Ríkisútvarpsins á svæðinu og skora þeir á Pál og Óðinn að endurskoða ákvörðunina.