Sunnlenska.is: Gríðarlega mikilvægur sigur

Gríðarlega mikilvægur sigur
================================================================================
sunnlenska on 27.01.2012 23:40
 
Hamarsmenn mættu vel stemmdir til leiks og komust strax í 13-2. Staðan var
18-12 að loknum 1. leikhluta. Blikar minnkuðu muninn í þrjú stig í 2.
leikhluta, 32-29, en Hamar skoraði síðustu tíu stig fyrri hálfleiks og
leiddu í leikhléinu, 42-29.
Heimamenn héldu sínu striki í upphafi 3. leikhluta og juku forskotið enn
frekar. Munurinn var 20 stig þegar mínúta var eftir af 3. leikhluta en Hamar
skoraði þá sjö stig í röð og staðan var 66-39 þegar 3. leikhluta var
lokið.
Eftir frábæran varnarleik í leiknum slökuðu Hvergerðingar aðeins á í
4. leikhluta og gestirnir minnkuðu muninn um sjö stig en þrátt fyrir það
var öruggur Hamarssigur í höfn.
Öldungurinn í liðinu, Svavar Páll Pálsson, var besti maður Hamars í
kvöld með 14 stig og 13 fráköst. Lárus Jónsson þjálfari var stigahæstur
með 17 stig og Ragnar Nathanaelsson og Louis Kirkman skoruðu báðir 9 stig.
Eftir leikinn er Hamar í 3. sæti deildarinnar með 14 stig, eins og
Breiðablik, en hefur betur í innbyrðis leikjum og á leik til góða á
Blika.