Jólahrákaka

Leturstærð: Decrease font Enlarge font
image

Þessi kaka er alveg upplögð til að bera fram í jólaboðinu.

Kakan er sérlega bragðgóð, mátulega saðsöm og einstaklega holl – stútfull af næringu. Já, og ekki skemmir fyrir hvað hún er jólaleg á litinn.

Botninn:

  • 1 bolli möndlur (lagðar í bleyti yfir nótt og afhýddar)
  • 1 bolli kókosmjöl
  • 1 bolli döðlur
  • Smá sjávarsalt

Aðferð:

  1. Kurlið niður möndlurnar (í matvinnsluvél eða blandara) og setjið í skál ásamt kókosmjölinu og sjávarsaltinu.
  2. Setjið döðlurnar í matvinnsluvél eða blandara og maukið. Setjið í skálina með hinu hráefninu og blandið vel saman. Gott að byrja að nota sleikju og síðan hendurnar.
  3. Setjið allt í hringlaga mót og þjappið vel niður.
  4. Setjið mótið til hliðar (ekki inn í frysti) á meðan þið búið til millilagið.

Millilag:

  • 1 bolli kasjúhnetur (lagðar í bleyti yfir nótt)
  • ¼ bolli akasíuhunang eða önnur sæta
  • ½ bolli kókosmjólk
  • ½ tsk ekta vanilla (duft en ekki dropar)
  • Örlítið sjávarsalt

Aðferð:

  1. Setjið allt í blandara og blandið vel eða þar til blandan er orðin silkimjúk og kekkjalaus.
  2. Hellið blöndunni yfir botninn og setjið mótið inn í frysti á meðan þið búið til hindberjakremið.

Hindberjakrem:

  • 2 bollar frosin hindber (sem eru búin að þiðna að mestu)
  • ½ bolli akasíuhunang eða önnur sæta
  • ¼-½ tsk kanill (alls ekki meira)
  • ½ tsk ekta vanilla (duft en ekki dropar)
  • 7 stk döðlur

Aðferð:

  1. Allt sett í blandara og blandað þar til kremið verður silkimjúkt.
  2. Sækið mótið úr frystinum og hellið kreminu yfir.
  3. Setjið mótið aftur inn í frysti.
  4. Best er að geyma kökuna í frysti yfir nótt áður en hún er borðuð en ef þið getið alls ekki beðið þá ættu nokkrar klukkustundir að duga.
  5. Kakan þarf svo að fá að standa á borðinu í smá stund áður en hún er skorin.

Gleðileg jól!


  • email Senda frétt
  • print Prentvæn útgáfa
  • Plain text Einfaldur texti