Vegan karamellu ískaka

Leturstærð: Decrease font Enlarge font
image

FAGURGERÐI - MATUR // Þessi ljúffenga ískaka er alveg ekta til að borða í sumarsólinni með góðum vinum.

Svo er hún er líka svo falleg að það er alveg extra gaman að framreiða hana :-)

Ekki láta langa innihalds/aðferðarlýsingu hræða ykkur – það er í alvörunni mjög lítið mál að búa til þessa ísköku.

Botninn:

  • 1 bolli pekanhnetur
  • ½ bolli valhnetur
  • 1 ½ bolli döðlur
  • Smá sjávarsalt

Aðferð:

  1. Setjið hneturnar í matvinnsluvél og kurlið smátt niður. Setjið í skál og leggið til hliðar.
  2. Setjið döðlurnar í matvinnsluvél og maukið þannig að úr verði döðlumauk. Setjið döðlurnar og sjávarsaltið í skálina með hnetunum.
  3. Blandið öllu vel saman. Mér finnst best að nota hendurnar og hnoða döðlunum og hnetunum saman þannig. En þið getið líka notað sleikju.
  4. Setjið bökunarpappír í ílangt kassalaga form (eða bara það form sem ykkar hentar).
  5. Setjið deigið í formið og pressið vel niður með höndunum. 
  6. Setjið formið inn í frysti á meðan þið búið til karamelluna og  fyllinguna.

Karamellan:

  • 2 kúffullar msk af möndlusmjöri (ég notaði dökkt möndlusmjör)
  • 3 msk hlynsíróp
  • 2 msk kókosolía
  • ½ tsk lífræn vanilla (duft en ekki dropar)
  • Örlítið sjávarsalt

Aðferð:

  1. Setjið allt saman í skál og bræðið í vatnsbaði. Þið getið líka sett beint í pott og brætt saman þannig en passið ykkur að karamellan brenni ekki við.
  2. Leggið karamelluna til hliðar og leyfið henni að kólna. 

Fyllingin:

  • 2 bollar kasjúhnetur (lagðar í bleyti yfir nótt)
  • ½ bolli kókosmjólk („full fat“)
  • 2 msk hlynsíróp (eða meira ef þið viljið hafa fyllinguna sætari)
  • 3 msk kókosolía
  • 2 msk sítrónusafi (úr ferskri sítrónu)
  • 1 tsk lífræn vanilla (duft en ekki dropar)
  • Örlítið sjávarsalt

Aðferð:

  1. Setjið allt í blandara og blandið vel saman.
  2. Takið formið úr frystinum og hellið fyllingunni yfir. Sléttið vel úr með sleikju.
  3. Náið í skálina með karamellunni og notið matskeið til að láta hana leka yfir fyllinguna. Hrærið karamellunni lauslega saman við fyllinguna, fram og til baka með skeiðinni. Karamellan á ekki að blandast fyllingunni fullkomlega, heldur aðallega bara á yfirborðinu.
  4. Setjið formið aftur inn í frysti og leyfið því að vera þar í nokkrar klukkustundir.

Súkkulaði:

  • ½ plata af dökku súkkulaði (ég notaði 85% súkkulaði)
  • 1 tsk kókosolía

Aðferð:

  1. Bræðið súkkulaði í vatnsbaði ásamt kókosolíunni. Þið getið líka brætt það í potti en eins og með karamelluna þá verðið þið að passa vel að það brenni ekki við.
  2. Takið formið úr frystinum og notið skeið til að láta súkkulaðið leka yfir ískökuna.
  3. Setjið formið aftur inn í frysti. Best er að geyma ískökuna í frysti yfir nótt þannig að hún verði örugglega þétt í gegn. Kakan þarf svo að fá að standa í sirka 30 mín á borðinu áður en hún er skorin.

Njótið!

 

  • email Senda frétt
  • print Prentvæn útgáfa
  • Plain text Einfaldur texti