FAGURGERÐI – MATUR // Þessar smákökur eru bæði hollar og góðar.
Þessar smákökur eru heldur ekkert venjulega góðar. Einhver gæti átt erfitt með að trúa því að þær séu í alvörunni hollar, en trúið mér, þær eru það svo sannarlega.
Sætan sem ég nota í uppskriftina er kókospálmasykur en hann hefur mjög lágan sykurstuðul. Það þýðir að hann veldur ekki sveiflum á blóðsykrinum.
Haframjölið og hneturnar eru sérlega trefjaríkar og stuðla þannig að góðri meltingu. Og þegar meltingin er góð þá er heilsan oftast góð líka.
Hráefni
- 2 bollar haframjöl (ég notaði glútenlaust frá Amisa)
- ½ bolli kókosolía, við stofuhita
- 2 „chia egg“*
- ¼ bolli jurtamjólk (ég notaði hrísmjólk í þetta skipti en möndlu- eða kókosmjólk er líka mjög góð)
- ½ bolli kókospálmasykur
- Smá sjávarsalt
- 1 tsk vínsteinslyftiduft
- 1 bolli kókosmjöl
- 1 msk kókoshveiti
- Tæpur 1 bolli pekanhnetur
+ 1 plata af súkkulaði, brætt í vatnsbaði ásamt 1 tsk af kókosolíu
*1 chia egg = 1 msk af möluðum chiafræjum + 3 msk af vatni og blanda vel saman.
Aðferð:
- Stillið bakaraofninn á 180° með blæstri og setjið bökunarpappír á ofnplötu. Ef þið raðið vel þá á deigið að komast fyrir á einni plötu.
- Setjið haframjölið í blandarann og blandið þannig að það verði að fíngerðu mjöli. Athugið að það tekur enga stund svo ekki fara langt frá blandaranum. Setjið haframjölið í stóra skál.
- Hellið kókosolíunni í skálina og blandið vel saman.
- Setjið chia eggin og jurtamjólkina saman við skálina og blandið vel saman.
- Setjið því næst kókospálmasykurinn, sjávarsaltið, vínsteinslyftiduftið, kókosmjölið og kókoshveitið í skálina og blandið vel.
- Saxið pekanhneturnar niður og setjið í skálina. Blandið öllu vel saman. Gott er að nota handþeytara svo að allt blandist örugglega vel saman. Að sjálfsögðu má líka nota hrærivél.
- Notið teskeið til að móta litlar kúlur úr deiginu. Fletjið kúlurnar í lófunum ykkar þannig að þær verða flatar. Þið getið líka stillt öllum kúlunum upp á ofnplötuna og flatt þær svo út, annað hvort með flötum lófa eða glasbotni.
- Setjið plötuna inn í ofn og bakið í 10 mínútur eða þar til smákökurnar byrja að brúnast.
- Kælið smákökurnar og pennslið þær með súkkulaði.
- Geymið smákökurnar á köldum stað.
Njótið!
ATH. #1 Til að mala chiafræin er best að skella þeim í blandarann í skamma stund. Passið að hafa þau ekki of lengi í blandaranum – þá er hætta á að þau verði olíukennd. Einnig er hægt að kaupa tilbúin möluð chiafræ en ég mæli frekar með hinu enda sáraeinfalt.
ATH. #2 „Chia eggin“ virka eins og hænuegg í uppskriftinni – sjá um að líma hráefnið allt saman. Þannig að alls ekki sleppa þeim.
ATH. #3 Ég notaði 85% súkkulaði til að pensla kökurnar með. Þið ráðið hversu dökkt eða ljóst súkkulaði þið notið en athugið að því ljósara sem súkkulaðið er, því meiri sykur er í því. Ef þið eruð ekki mikið fyrir dökkt súkkulaði en viljið ekki súkkulaði með mjólk, þá getið þið t.d. notað vegan súkkulaðið frá Ichoc sem er bæði ljóst og mjólkurlaust.
