Dásamlegt valhnetusúkkulaði

Leturstærð: Decrease font Enlarge font
image

FAGURGERÐI - MATUR // Þetta súkkulaði er alveg bráðhollt!

Það inniheldur holla og góða fitu, andoxunarefni, magnesíum, flavonóíð og ýmislegt fleira sem kætir og nærir frumur líkamans.

Botninn:

  • 1 bolli valhnetur (lagðar í bleyti yfir nótt)
  • 1 bolli döðlur
  • 1 msk kakónibbur
  • ½ tsk lífræn vanilla (duft en ekki dropar)
  • Smá sjávarsalt

Aðferð:

  1. Hellið vatninu af valhnetunum og skolið hneturnar með volgu vatni.
  2. Setjið valhneturnar í matvinnsluvél og kurlið vel niður.
  3. Setjið döðlurnar, kakónibburnar, vanilluna og sjávarsaltið í matvinnsluvélina og blandið öllu vel saman.
  4. Setjið valhnetumaukið í meðalstór sílikonform (sem passar muffinskökum). Þetta passar vel í sex form. Gott er að nota matskeið til að skipta valhnetumaukinu á milli formanna. Sléttið einnig úr maukinu með skeðinni.
  5. Setjið formin inn í frysti í klukkutíma (eða lengur).

Súkkulaðið:

  • ½ bolli kakósmjör
  • ½ bolli hreint kakó (ég notaði frá Sólgæti)
  • ¼ bolli akasíuhunang (ég notaði raw frá Biona)
  • 1 msk lucuma
  • ½ tsk lífræn vanilla (duft en ekki dropar)
  • Smá sjávarsalt

+ kókosflögur til að skreyta með

Aðferð:

  1. Bræðið kakósmjörið í vatnsbaði. Fyrir þá sem vita ekki hvað það þýðir þá snýst það um að setja skál með kakósmjöri í pott með vatni. Kveikja svo undir hellunni (ég set alltaf á hæsta straum) og bíða eftir að hitinn frá vatninu bræði kakósmjörið í skálinni. Ég á sjálf skál með skafti sem hangir yfir pottinum (kemur ekki við botninn) sem ég keypti einhvern tímann í IKEA fyrir löngu síðan :-)
  2. Á meðan kakósmjörið er að bráðna, setjið þá kakóduftið, lucuma duftið, vanilluna og sjávarsaltið í skál og blandið vel.
  3. Þegar kakósmjörið er orðið fljótandi, hellið því þá í skálina með þurrefnunum ásamt hunanginu. Blandið öllu vel saman með litlum písk.
  4. Takið sílikonformin úr frystinum og hellið súkkulaðinu í formin. Gott er að nota stóra skeið eða mjög litla ausu til að skipta súkkulaðinu nokkuð jafnt á milli formanna.
  5. Best er að leyfa súkkulaðinu að harðna örlítið áður en þið myljið kókosflögurnar yfir. Ef þið voruð með fomin inn í frysti í meira en klukkutíma þá ætti súkkulaðið að byrja harðna fljótlega eftir að þið hellið því í formin. Kuldinn frá valhnetumaukinu er fljótur að koma kakósmjörinu aftur í fast form. Annars getið þið líka skellt fomunum aftur inn í frysti í sirka 10 mínútur en passið að láta súkkulaðið ekki verða hart í gegn.
  6. Myljið kókosflögunum yfir. Magn eftir smekk. Best ef kókosflögurnar sökkvi örlítið ofan í súkkulaðið en hverfi samt ekki alveg ofan í það :-)
  7. Setjið formin aftur inn í fyrsti í sirka klukkutíma. Þá er þetta dásamlega valhnetusúkkulaði tilbúið.

Njótið!

  • email Senda frétt
  • print Prentvæn útgáfa
  • Plain text Einfaldur texti