Tveggja ára afmæli á 800

Árni Steinarsson og Eiður Birgisson, veitingamenn á 800Bar. sunnlenska.is/Guðmundur Karl

Það verður mikið um að vera á 800Bar á Selfossi um helgina en staðurinn heldur upp á 2 ára afmæli sitt.

„Já, það stendur mikið til og við ætlum að fagna afmælinu alveg frá fimmtudegi fram á sunnudagskvöld. Það verða afmælistilboð á barnum og á laugardagskvöld mun Vífilfell bjóða fyrstu gestunum upp á fría drykki,“ segir Eiður Birgisson, veitingamaður á 800, í samtali við sunnlenska.is og þakkaði gestum staðarins fyrir frábærar móttökur á síðastliðnum tveimur árum.

Afmælisveislan nær hápunkti á laugardagskvöld þegar strákarnir í Skítamóral spila á afmælisdansleik. Forsala á ballið er á 800Bar á fimmtudagskvöld.

Veislan byrjar reyndar í kvöld þegar trúbadorar keyra helgina í gang og líklegt að einhverjir muni fagna sigri Selfyssinga þar. Á föstudagskvöld mæta trúbadorarnir í Bee on Ice en þeir unnu trúbadorakeppni FM957 fyrir skömmu.

Á sunnudagskvöld verður ekki slegið slöku við því þá verður Splash partí með 16 ára aldurstakmarki. Þarna mæta DJ Óli Geir, Friðrik Dór, Haffi Haff, Júlí Heiðar og fleiri.