Hljómsveitin Flekar gefur út sína fyrstu plötu

Leturstærð: Decrease font Enlarge font
image Hljómsveitin Flekar.

Hljómsveitin Flekar gefur út sína fyrstu plötu á morgun, mánudaginn 8. október. Sú nefnist Swamp Flowers, og verður útgáfunni fylgt eftir með ýmiskonar tónleikahaldi, meðal annars veglegum útgáfutónleikum á Húrra þann 24. október.

Platan verður gefin út sem glæsileg vínylplata og mun hljómsveitin kynna hana með litlum tónleikum í Reykjavík Record Shop þann 10. október og í Lucky Records þann 13. október. Platan verður einnig aðgengileg á Spotify og verða gefin út myndbönd við lögin á YouTube í kjölfar útgáfunnar.

Flekar eru alsunnlenskt band en hljómsveitina skipa þeir Skúli Arason, Sigurbjörn Már Valdimarsson og Vignir Andri Guðmundsson. Platan er alfarið spiluð, samin, tekin upp og hljóðblönduð af meðlimum sveitarinnar í heimahljóðveri og hefur verið legið yfir smáatriðum og farið á köflum hættulega nálægt sársaukamörkum í rit- og endurskoðun. Sibbi sá um upptökur og hljóðblöndun plötunnar og Skúli sá um hönnun og frágang umslagsins. Finnur Hákonarson sá um hljómjöfnun.

Heiðra gleymda perlu
Fyrstu lögin af plötunni sem fengið hafa að hljóma eru Without a Rider og Terrible Movies, sem hafa fengið góðar viðtökur. Lagið ‘Blue Whale Blues’ er nú kynnt til spilunar og má sjá glæsilegt myndband við lagið hér neðst í fréttinni. Myndbandið er gert af Skúla, trommara og hljómborðsleikara sveitarinnar, og er nokkurs konar heiðrun á svo til gleymdri perlu frá níunda áratugnum, sem er lagið Ástarblóm með tónlistarmanninum Sigga Helga. Myndbandið við Ástarblóm er þannig sveipað dulúð og drunga sem varð til þess að Flekar leituðu í þann djúpa brunn við gerð Blue Whale Blues.

Héldu tónleika fyrir búfénað og stolta foreldra
Þó hljómsveitin Flekar sé tiltölulega ný á öldum ljósvakans má segja að saga hljómsveitarinnar hafi byrjað við lok níunda áratugarins þegar þá barnungir meðlimir sveitarinnar, Sigurbjörn og Vignir og systkini þeirra, söguðu sér út gítara úr krossvið, strengdu með böndum, röðuðu bílfelgum upp í trommusett og héldu tónleika fyrir búfénað og stolta foreldra. Þannig kviknuðu saklausir draumar um stærri hluti sem þó náðu ekki lengra. Swamp Flowers er að hluta til uppgjör við þennan tíma og það ferðalag fór í hönd í kjölfarið. 


 

 

  • email Senda frétt
  • print Prentvæn útgáfa
  • Plain text Einfaldur texti