Guðbjörg Viðja sigraði í Blítt og létt

Guðbjörg Viðja Antonsdóttir frá Syðra-Holti í Svarfaðardal sigraði í Blítt og létt, söngkeppni nemenda Menntaskólans að Laugarvatni sem haldin var fyrir skömmu.

Guðbjörg Viðja renndi sér af öryggi og fagmennsku í gegnum Queen-smellinn Somebody to love ásamt aðstoðarfólki sínu, bakraddasöngvurunum Sigrúnu Birnu P. Einarsson, Aron Ými Antonssyni og Elvu Rún Pétursdóttur. Þau verða fulltrúar Menntaskólans að Laugarvatni í söngvakeppni framhaldsskólanna í vor.

Í öðru sæti varð Laugvetningurinn Ástrós Pálmadóttir ásamt þeim Kamillu Mikaelsdóttur og Hrafnhildi J. B. Sigurðardóttur með flutningi sínu á gamla Grýlusmellnum Valur og jarðarberjamaukið hans.

Í þriðja sæti urðu bræðurnir Viðar Janus og Þórarinn Guðni Helgasynir, frá Gegnishólaparti í Flóahreppi, sem tóku fyrir enn eitt lagið sem telst í eldri kantinum, Ring of Fire, sem Johnny nokkur Cash kom á toppinn fyrir einhverjum árum.

Skemmtilegasta atriðið var einnig valið, en þann titil hlaut atriði þeirra Sólveigar Þrastardóttur og Alexöndru Ránar Hannesdóttur sem röppuðu af hjartans lyst með líflegum dönsurum sér til fulltingis, þeim Emil Sigurbjörnssyni, Tamitu Loise Olayvar og Inger Erlu Thomsen.

Hljómsveitin Steinn & Co., sem er að mestu skipuð fyrrum ML-ingum, var öryggi uppmálað í gegnum hinar fjölbreyttu tónlistartegundir og stefnur sem atriðin tólf kölluðu á.

Hér fyrir neðan má sjá myndband með sigurlaginu:

Fyrri greinAníta Rós og Ingi Sveinn bikarmeistarar
Næsta greinTekist á um rekstrarstöðuna í bæjarstjórn