Ómar Guðjóns og Tómas R. í Höfninni og á Klaustri

Gítarleikarinn Ómar Guðjónsson og kontrabassaleikarinn Tómas R. Einarsson hafa spilað saman í áratug, ýmist tveir einir eða í fjölmennari hljómsveitum.

Innanlands og utan: Flatey, Djúpavík, Moskva, Andorra, Berlín, Havana, Washington DC….

Nú hafa þeir gert langþráðan draum að veruleika: að taka upp plötu þar sem þeir semja hvor fyrir annan. Þar er músíkölsk samræða æðsta markmiðið, hvort sem um er að ræða sveiflu, latíntónlist eða ballöður.

Upptakan fór fram á Kolsstöðum í Borgarfirði, á sólríkum sumardögum þar sem hvít jöklabreiða bar við augu út um upptökuglugga ásamt hrauni og blómstrandi kjarri.

Ómar og Tómas munu kynna plötuna Bræðralag með tónleikaferð hringinn í kringum landið. Í Þorlákshöfn halda þeir tónleika í Ráðhúsinu miðvikudaginn 30. september og hefjast þeir kl. 20:30.

Á Kirkjubæjarklaustri verða tónleikar í Systrakaffi fimmtudagskvöldið 1. október kl. 20:30.

Verð aðgöngumiða er 2.500 kr.

Fyrri greinMýrdalshreppur tekur lán til gatnagerðar
Næsta greinÚrslitaleikir hjá Þór og FSu í kvöld